Axbborot soati-23-05-2017: “Harakatlar strategiyasi”, “Xalq bilan muloqot va inson manfaatlari yili” Davlat dasuri hamda mamlakatimizda olib borilayotgan islohotlar mazmuni va ulardan kelib chiqadigan xulosalar

Mustaqillik yillarida mamlakatda huquqiy demokratik davlat, kuchli fuqarolik jamiyati qurishga, erkin bozor munosabatlariga va xususiy mulk ustuvorligiga asoslangan iqtisodiyotni rivojlantirishga, xalq osoyishta va farovon hayot kechirishi uchun shart-sharoitlar yaratishga, xalqaro maydonda O‘zbekistonning munosib o‘rin egallashiga qaratilgan kompleks chora-tadbirlar amalga oshirildi.

Bosib o‘tilgan yo‘l va orttirilgan tajribani xolisona baholashdan, mustaqillik yillarida erishilgan yutuqlarni tahlil qilishdan hamda zamon talablaridan kelib chiqqan holda, oldimizda demokratik islohotlarni yanada chuqurlashtirish va mamlakat taraqqiyotini jadallashtirishning muhim ustuvorliklarini hamda aniq marralarini belgilash vazifasi turgan edi.

Mazkur vazifani amalga oshirish yo‘lida aholining keng qatlamlari, jamoatchilik va ishbilarmon doiralar vakillari, davlat organlarining rahbarlari va mutaxassislari bilan amaliy suhbat hamda muhokamalar olib borildi, shuningdek amaldagi qonun hujjatlari, milliy va xalqaro tashkilotlarning axborot-tahliliy materiallari, ma’ruzalari, tavsiyalari va sharhlari o‘rganildi, rivojlangan xorijiy mamlakatlar tajribasi tahlil qilindi.

Kelib tushgan takliflarni jamlash, chuqur o‘rganish hamda umumlashtirish asosida O‘zbekiston Respublikasi Prezidentining “O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida”gi Farmoni loyihasi ishlab chiqilib, u bilan:

2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi (keyingi o‘rinlarda – Harakatlar strategiyasi);

Harakatlar strategiyasini “Xalq bilan muloqot va inson manfaatlari yili”da amalga oshirishga oid Davlat dasturi (keyingi o‘rinlarda – Davlat dasturi) tasdiqlandi.

Loyihalarni tayyorlash davomida aholining keng qatlamlari orasida qizg‘in muhokamalar olib borildi. Loyihalar muhokama uchun turli axborot maydonlariga joylashtirildi, ularning natijasida ko‘plab taklif va mulohazalar kelib tushdi. Fuqarolar siyosiy-huquqiy borada yuksak faollik ko‘rsatib, olib borilayotgan islohotlarga alohida qiziqish va daxldorlikni namoyon qildilar.

Xususan, loyihalarning “Qonun hujjatlari ta’sirini baholash tizimi” portalida yo‘lga qo‘yilgan jamoatchilik muhokamasi natijalari bo‘yicha 1 310 ta taklif va mulohaza kelib tushib, ular asosida Davlat dasturining 41 ta bandi qayta ko‘rib chiqildi.

SHu bilan birga, 2017 yil 23-27 yanvar kunlari Toshkent shahrida media-haftalik va xalqaro davra suhbati tashkil etilib, ularda 1 300 dan ortiq mutaxassis va ekspert, jamoatchilikning, ommaviy axborot vositalarining, diplomatik korpus va xalqaro tashkilotlarning, shuningdek O‘zbekistonda faoliyat yuritayotgan yirik xorijiy investorlarning vakillari ishtirok etishdi.

Harakatlar strategiyasiga O‘zbekiston Respublikasi Prezidenti SHavkat Mirziyoev tomonidan saylovoldi jarayoni, jamoatchilik, ishbilarmon doiralar vakillari hamda davlat organlari bilan uchrashuvlar chog‘ida bildirilgan mamlakatni ijtimoiy-siyosiy, sotsial-iqtisodiy, madaniy-gumanitar rivojlantirishning konseptual masalalari kiritildi.

Harakatlar strategiyasining maqsadi olib borilayotgan islohotlar samaradorligini tubdan oshirishdan, davlat va jamiyatning har tomonlama va jadal rivojlanishini ta’minlash uchun shart-sharoitlar yaratishdan, mamlakatni modernizatsiyalash va hayotning barcha sohalarini erkinlashtirishdan iboratdir.

Xususan, mamlakatni rivojlantirishning quyidagi 5 ta ustuvor yo‘nalishi belgilangan:

1. Davlat va jamiyat qurilishini takomillashtirish;

2.Qonun ustuvorligini ta’minlash va sud-huquq tizimini yanada isloh qilish;

3. Iqtisodiyotni yanada rivojlantirish va liberallashtirish;

4. Ijtimoiy sohani rivojlantirish;

5.Xavfsizlik, millatlararo totuvlik va diniy bag‘rikenglikni ta’minlash, chuqur o‘ylangan, o‘zaro manfaatli va amaliy ruhdagi tashqi siyosat yuritish.

Mazkur yo‘nalishlarning har biri mamlakatdagi islohotlarni va yangilanishlarni yanada chuqurlashtirishga oid aniq bo‘limlardan iborat.

Harakatlar strategiyasini besh bosqichda amalga oshirish nazarda tutilmoqda, bunda yillarga beriladigan nomlarga muvofiq har yili uni amalga oshirish bo‘yicha Davlat dasturi tasdiqlanadi.

Davlat dasturining “Davlat va jamiyat qurilishini takomillashtirish” deb nomlangan birinchi yo‘nalishini amalga oshirishda davlat hokimiyati tizimida Oliy Majlisning rolini kuchaytirish, qonun ijodkorligi faoliyatining sifatini tubdan yaxshilash, davlatning hayotida siyosiy partiyalarning rolini kuchaytirish nazarda tutilgan.

Davlat boshqaruvini takomillashtirish, eng avvalo davlat xizmatini isloh qilish, iqtisodiyotda davlat boshqaruvini kamaytirish, davlat va xususiy sektorlarning o‘zaro foydali hamkorligining zamonaviy shakllarini, “Elektron hukumat” tizimini rivojlantirish bo‘yicha chora-tadbirlarni amalga oshirish rejalashtirilgan.

Xalq bilan samarali muloqotni ta’minlash Davlat dasturining eng muhim va dolzarb vazifalaridan biri bo‘ldi. SHu munosabat bilan jamoatchilik nazoratini takomillashtirish, nodavlat notijorat tashkilotlarini, ommaviy axborot vositalarini yanada rivojlantirish, shuningdek mahallaning jamiyat hayotidagi rolini kuchaytirish nazarda tutilmoqda.

Davlat dasturining ikkinchi yo‘nalishi qonun ustuvorligini va sudning chinakam mustaqilligini ta’minlash chora-tadbirlarini nazarda tutadi. Jumladan, qarorlar qabul qilishda sudlar mustaqilligini ta’minlashi kerak bo‘lgan Oliy sud kengashini tuzish, professional sudyalar korpusini shakllantirish, sudyalarning huquqlari va qonuniy manfaatlarini himoya qilishga doir chora-tadbirlarni amalga oshirish rejalashtirilmoqda.

Ma’muriy sudlarni, xo‘jalik sudlari tizimida mintaqaviy apellyasiya sudlarini tuzish, sudya yordamchisi lavozimini ta’sis etish orqali sudlarni kelgusida ixtisoslashtirish va ularning devonini mustahkamlash nazarda tutilmoqda.

Sansalorlikka va ishlarning ko‘rib chiqilishi sudlar tomonidan asossiz cho‘zib yuborilishiga yo‘l qo‘ymaslik maqsadida protsessual qonun hujjatlarini takomillashtirish, quyi instansiya sudlarining kamchiliklarini mustaqil bartaraf etish va uzil-kesil qaror qabul qilish yuzasidan yuqori sud instansiyalarining vakolatlarini kengaytirish rejalashtirilmoqda.

Ushbu yo‘nalish doirasida barcha huquqni muhofaza qilish va nazorat organlari, davlat hamda xo‘jalik boshqaruvi organlari, mahalliy davlat hokimiyati organlari rahbarlarining xalq bilan bevosita muloqotini yo‘lga qo‘yish chora-tadbirlarini ro‘yobga chiqarish, aholi ularga erkin murojaat eta olishini ta’minlash, jismoniy va yuridik shaxslarning huquqlari hamda erkinliklari buzilganligi to‘g‘risidagi murojaatlarning, xabarlarning o‘z vaqtida olinishini ta’minlash nazarda tutilmoqda.

Huquqbuzarliklarning oldini olish tizimiga, jinoyatchilikka qarshi kurashish va jamoat tartibini saqlash bo‘yicha ichki ishlar organlarining faoliyatini tubdan takomillashtirishga alohida e’tibor qaratiladi.

SHuningdek ushbu yo‘nalish 2018-2021 yillarda jinoyat va jinoyat-protsessual qonun hujjatlarini yanada takomillashtirish konsepsiyasini ishlab chiqishni, sud, huquqni muhofaza qilish va nazorat organlari xodimlarini o‘qitish, tanlash va joy-joyiga qo‘yish tizimini takomillashtirishni, murojaatlarni muntazam tahlil qilishni hamda vaqti-vaqti bilan uning natijalarini e’lon qilib borishni, advokaturani rivojlantirishni, notariat tizimini va FHDYO organlarini isloh qilishni ham o‘z ichiga oladi.

“Iqtisodiyotni yanada rivojlantirish va liberallashtirish” deb nomlangan uchinchi yo‘nalishda  ko‘rsatilgan chora-tadbirlarni ro‘yobga chiqarish uchun milliy valyuta va narxlarning barqarorligini ta’minlash, valyutani tartibga solishning zamonaviy bozor mexanizmlarini bosqichma-bosqich joriy etish, mahalliy byudjetlarning daromad bazasini kengaytirish, tashqi iqtisodiy aloqalarni kengaytirish, eksportga mo‘ljallangan mahsulot va materiallar ishlab chiqarish uchun zamonaviy texnologiyalarni joriy etish, transport-logistika infratuzilmasini, tadbirkorlikni rivojlantirish hamda xorijiy investorlar uchun investitsiyaviy jozibadorlikni oshirish, soliq ma’murchiligini yaxshilash, bank faoliyatini tartibga solishning zamonaviy prinsiplari va mexanizmlarini joriy etish, ko‘p tarmoqli fermer xo‘jaliklarini rivojlantirish, shuningdek turizm industriyasini jadal rivojlantirish nazarda tutilmoqda.

SHuningdek ushbu yo‘nalish xususiy mulkni, moliya bozorini himoya qilish, qishloq xo‘jaligini modernizatsiyalash, zargarlik sohasini rivojlantirish, ayrim milliy korxonalarning aksiyalarini (IPO) nufuzli xorijiy fond birjalariga dastlabki tarzda joylashtirishga tayyorgarlik ko‘rish chora-tadbirlarini ham o‘z ichiga oladi.

2017-2021 yillarda umumiy qiymati 40 milliard AQSH dollari miqdoridagi 649 ta investitsiya loyihasini nazarda tutuvchi tarmoq dasturlarini ro‘yobga chiqarish rejalashtirilmoqda. Natijada keyingi 5 yilda sanoat mahsulotini ishlab chiqarish 1,5 baravar, uning yalpi ichki mahsulotdagi ulushi 33,6 foizdan 36 foizgacha, qayta ishlash tarmog‘i ulushi 80 foizdan 85 foizgacha oshadi.

“Ijtimoiy sohani rivojlantirish” deb nomlangan to‘rtinchi yo‘nalish  aholi bandligini oshirish, fuqarolarni ijtimoiy himoya qilish va ularning salomatligini saqlash, yo‘l-transport, muhandislik-kommunikatsiya hamda ijtimoiy infratuzilmani rivojlantirish va modernizatsiyalash, aholini elektr energiya, gaz bilan ta’minlashni yaxshilash, aholining muhtoj qatlamlariga ko‘rsatiladigan ijtimoiy yordam sifatini oshirish, xotin-qizlarning ijtimoiy-siyosiy hayotdagi maqomini oshirish, sog‘liqni saqlash sohasini isloh qilish, maktabgacha ta’lim muassasalarining qulayligini ta’minlash, umumiy o‘rta ta’lim, o‘rta maxsus va oliy ta’lim sifatini yaxshilash hamda ularni rivojlantirish chora-tadbirlarini amalga oshirishni nazarda tutadi.

Xususan, hududlarni har tomonlama rivojlantirish bo‘yicha qariyb 25 mingta investitsiya loyihasini ro‘yobga chiqarish hisobiga 256,4 ming ish o‘rni tashkil etish orqali aholini ish bilan ta’minlash dasturlarini to‘liq ijro etish nazarda tutilgan. Ishsizlik darajasi eng yuqori bo‘lgan mintaqalarda 46,8 ming yangi ish o‘rni tashkil etish, tadbirkorlik faoliyatini boshlash uchun ta’lim muassasalarining 10 ming nafar bitiruvchisiga kreditlar ajratish rejalashtirilmoqda.

Katta yoshli avlodni qo‘llab-quvvatlash, ijtimoiy nafaqalar berish tartibini takomillashtirish, sog‘liqni saqlash sohasini isloh qilish chora-tadbirlari kiritilgan. Jumladan, 78 ta tuman tibbiyot birlashmasini, 7 ta shahar va 2 ta viloyat ko‘p tarmoqli tibbiyot markazini qayta qurish, tez tibbiy yordam xizmatini 1200 ta maxsus avtotransport bilan ta’minlash rejalashtirilmoqda.

Qishloq joylarda 15 mingta arzon uy-joy, 415 kilometrlik suv ta’minoti quvurlari, 316 kilometrlik gaz ta’minoti quvurlari va 291 kilometrlik ichki yo‘llar qurish rejalashtirilgan. Aholiga transport xizmatlari ko‘rsatish sifatini yaxshilash maqsadida 86 ta yangi avtobus yo‘nalishini joriy etish va 537 ta zamonaviy avtobus xarid qilish nazarda tutilmoqda.

“Xavfsizlik, millatlararo totuvlik va diniy bag‘rikenglikni ta’minlash, chuqur o‘ylangan, o‘zaro manfaatli va amaliy ruhdagi tashqi siyosat yuritish” deb nomlangan beshinchi yo‘nalish  doirasida respublikaning konstitutsiyaviy tuzumini, suverenitetini, hududiy yaxlitligini himoya qilishga doir chora-tadbirlarni ro‘yobga chiqarish, kiberxavfsizlik sohasida axborot, normativ-huquqiy asoslar tizimini takomillashtirish, aholini favqulodda vaziyatlardan xabardor qilish tizimini tashkil etish va rivojlantirish, Orol fojiasining oqibatlarini yumshatish, shuningdek Millatlararo munosabatlar sohasidagi siyosatning ustuvor yo‘nalishlari konsepsiyasini hamda Diniy sohadagi davlat siyosati konsepsiyasini ishlab chiqish nazarda tutilmoqda.

SHu bilan birga, xorijiy hamkorlar bilan siyosiy-diplomatik sohadagi hamkorlikni rivojlantirishga doir “Yo‘l xaritalari”ni ishlab chiqish, O‘zbekistonning xorijiy hamkorlar bilan 2017 yilga mo‘ljallangan savdo-iqtisodiy, investitsiyaviy, texnologik va moliyaviy-texnik hamkorligini tubdan rivojlantirish va kengaytirish rejalashtirilmoqda.

Davlat dasturining yuqorida qayd etilgan barcha chora-tadbirlarini amalga oshirishga 37,7 trillion so‘m va 8,3 milliard AQSH dollari yo‘naltiriladi.

Kelgusi besh yilda mamlakatni rivojlantirishning strategik va ustuvor yo‘nalishlarini belgilash maqsadida Farmon asosida, O‘zbekiston Respublikasi Prezidenti boshchiligida Harakatlar strategiyasini amalga oshirish bo‘yicha Milliy komissiya tuzilmoqda.

Davlat dasturiga kiritilgan tadbirlar to‘liq, o‘z vaqtida va sifatli bajarilishini nazorat qilish Harakatlar strategiyasi beshta yo‘nalishining har biri bo‘yicha tuzilgan komissiyalar zimmasiga yuklatilgan.

Ushbu komissiyalar zimmasiga nafaqat yuqorida qayd etilgan vazifalarni amalga oshirish, balki 2018-2021 yillarga mo‘ljallangan Harakatlar strategiyasini amalga oshirish bo‘yicha tegishli yillik davlat dasturlari loyihalarini tayyorlash ham yuklatilmoqda.

Harakatlar strategiyasining amalga oshirilishi O‘zbekiston Respublikasining mamlakatni isloh qilish va modernizatsiyalash, rivojlangan bozor iqtisodiyotiga asoslangan huquqiy demokratik davlat, kuchli fuqarolik jamiyati barpo etish, qonun ustuvorligini, xavfsizlik va huquq-tartibotni, davlat chegaralarining daxlsizligini, jamiyatda millatlararo totuvlik va diniy bag‘rikenglikni ta’minlash yo‘lidagi shaxdam harakatlariga yangi kuch bag‘ishlaydi.

Prezidentimiz SHavkat Mirziyoev g‘oyasi va rahbarligida ishlab chiqilgan mamlakatimizni yanada rivojlantirish bo‘yicha Harakatlar strategiyasi Vatanimiz tarixida, xalqimiz hayotida yangi taraqqiyot bosqichini boshlab berdi. Bunda besh ustuvor yo‘nalish besh yilda amalga oshiriladi. 

Prezidentimiz SHavkat Mirziyoevning 2017 yil 7 fevraldagi farmoni bilan tasdiqlangan Harakatlar strategiyasida mamlakatimizni rivojlantirishning besh ustuvor yo‘nalishi – davlat va jamiyat qurilishini takomillashtirish, qonun ustuvorligini ta’minlash va sud-huquq tizimini yanada isloh qilish, iqtisodiyotni yanada rivojlantirish va liberallashtirish, ijtimoiy sohani taraqqiy ettirish, xavfsizlik, millatlararo totuvlik va diniy bag‘rikenglikni ta’minlash, chuqur o‘ylangan, o‘zaro manfaatli va amaliy ruhdagi tashqi siyosat yuritish bo‘yicha aniq, hayotiy islohotlar, ularni amalga oshirish mexanizmlari belgilab berilgan. Oradan qisqa vaqt o‘tganiga qaramay, bu tarixiy hujjatning amaliy samaralari hayotimizda o‘z ifodasini topmoqda. Jumladan, jismoniy va yuridik shaxslar murojaatlari bilan ishlashda mutlaqo yangi tizim – Xalq qabulxonalari institutiga asos solindi, mahalla tuzilmasi, ta’lim, ilm-fan, sog‘liqni saqlash, farmatsevtika, sud-huquq, ichki ishlar, tashqi savdo tizimlari, arxitektura va qurilish, xususiy mulkchilik va tadbirkorlikni rivojlantirish, uy-joy kommunal xizmat ko‘rsatish, qonun hujjatlarini tarqatish, yo‘l xo‘jaligi, madaniyat va sport sohalari tubdan takomillashtirilib, ularning faoliyati samaradorligi oshirilmoqda.

Bularning samarasida xalqimizning davlat idoralariga ishonchi ortmoqda. Davlatimizning iqtisodiy yuksalishi oddiy odamlarning orzu-umidlari bilan uyg‘unlashmoqda. Aholida islohotlarda faol ishtirok etish kuchayib, sohalarni rivojlantirishda inson omili asosiy o‘ringa chiqmoqda. Boshqacha aytganda, davlat idoralari xalqimizga xizmat qilmoqda.

Xo‘sh, Harakatlar strategiyasida belgilangan ustuvor yo‘nalishlar, maqsad-vazifalar to‘laqonli bajarilsa, oddiy odamlar hayotida qanday natijalarga olib keladi? Bu islohotlar samaralari nimalarda namoyon bo‘ladi?

– Bunda, avvalo, kuchli fuqarolik jamiyati barpo qilinadi, xalqimiz turmush darajaci keskin oshadi, – deydi O‘zbekiston davlat san’at va madaniyat instituti professori Mansur Bekmurodov. – Tadbirkorlik faoliyati real hayot tarziga, yalpi ijtimoiy harakatga aylanadi. Bandlik darajasiga hamohang soliq to‘lovchilar ham keskin ko‘payadi. Davlatning eksport salohiyati oshib, yangi ob’ektlar qurilishi ko‘lami ham kengayadi. Uy-joy muammosi bartaraf etiladi. Har bir soha hamjihat va uyg‘un holda, eng muhimi, to‘laqonli ma’rifat asosida ishlay boshlaydi, «bank ma’naviyati», «fermerlik ma’rifati», «tadbirkorlik madaniyati» taomilga kiradi.

Har qanday jamiyatda ezgu va buyuk maqsadlar bo‘lgan, biroq Harakatlar strategiyasi taraqqiyotga erishishning o‘zbek maktabi sifatida insoniyat tarixida o‘chmas iz qoldirishi, asrlar osha namuna vazifasini o‘tashi uchun bu islohotlar to‘la amalga oshirilishi kerak. Buning uchun, avvalo, oddiy odamlar mazkur tarixiy hujjatning mohiyati, maqsad-muddaosi uning o‘zi, oilasi, avlodlari hayoti bilan chambarchas bog‘liq ekanini anglab etishi kerak.

– Bunda bir haqiqat aniq: targ‘ibot-tushuntirish tadbirlari odamlar istak-xohishlari, qiziqishlari va ichki ehtiyojlariga mos tashkil qilinishi, bunda oddiy aholi faol qatnashishiga erishish lozim,

Harakatlar strategiyasi va Prezidentimizning shu yil 21 fevraldagi “O‘zbekiston Respublikasi sud tizimi tuzilmasini tubdan takomillashtirish va faoliyati samaradorligini oshirish chora-tadbirlari to‘g‘risida”gi farmoni asosida mamlakatimiz Oliy sudi va Oliy xo‘jalik sudining fuqarolik, jinoiy, ma’muriy va iqtisodiy sud ish yurituvi sud hokimiyatining yagona oliy organi – Oliy sudga birlashtirildi. Oddiy aholi bu bilan sud tizimida bir-birini takrorlovchi funksiyalar bartaraf etilishi, yagona sud amaliyoti shakllantirilishini teran anglasa, islohotlarning hayotiy samaradorligi oshadi. Targ‘ibot tadbirlarida bu islohotlarni odamlar bevosita muloqotlar tarzida, ularning esida qoladigan misollar bilan targ‘ib qilsak, maqsadga muvofiq bo‘ladi.

Mamlakatimiz aholisining 60 foizdan ortig‘ini yoshlar tashkil etadi. YOshlar – jamiyatimizda hal qiluvchi kuch, ertamiz egalari. Biroq bugun yoshlar yangi-yangi, buyuk imkoniyatlar bilan birga, turli yovuz xavf-xatarlarga ham duch kelayotir. Davlatimiz rahbari Konstitutsiyamiz qabul qilinganining 24 yilligiga bag‘ishlangan tantanali marosimdagi ma’ruzasida bu masalaga yana bir bor e’tibor qaratib, «Bolalarimizni birovlarning qo‘liga berib qo‘ymasdan, ularni o‘zimiz tarbiyalashimiz lozim. Buning uchun yoshlarimiz bilan ko‘proq gaplashish, ularning qalbiga quloq solish, dardini bilish, muammolarini echish uchun amaliy ko‘mak berishimiz kerak. Bu borada uyushmagan yoshlar bilan ishlashga alohida e’tibor qaratishimiz zarur», deb ta’kidlagani bejiz emas.

– Harakatlar strategiyasi barcha, jumladan, yoshlar uchun ham tushunarli tilda yozilgan, bu dasturilamal hujjatni ishlab chiqishda, uning loyihasi muhokamalarida yoshlar ham faol qatnashdi, ularning qator taklif-mulohazalari bunda o‘z ifodasini topdi.

Bunda asosan qiziqarli uchrashuvlar, jonli muloqotlar tashkil qilinadi, zamonaviy usullardan, internet imkoniyatlaridan unumli foydalanamiz. «Taraqqiyot strategiyasi» markazida qator loyihalarni amalga oshirishni rejalashtirilgan. Harakatlar strategiyasi emblemasi tushirilgan turli liboslar, buyumlar, o‘quv qurollari va boshqa targ‘ibot vositalari tayyorlanib, yoshlarga tarqatiladi.

– Parlament a’zolari bugun hududlarda bo‘lib, oddiy odamlar qalbiga quloq solish, ularning muammolarini o‘rganish, murojaatlarga amaliy echim topishda yaqindan yordam berib kelmoqda, bu uchrashuvlarda muammolarni hal qilish bilan birga, mamlakatimiz qonunchiligidagi o‘zgarishlar, Harakatlar strategiyasi mazmun-mohiyatini ham keng targ‘ib etilmoqda.

Harakatlar strategiyasidagi beshta ustuvor yo‘nalishning biri iqtisodiy sohani yanada rivojlantirish va liberallashtirishga yo‘naltirilgan makroiqtisodiy barqarorlikni mustahkamlash, yuqori iqtisodiy o‘sish sur’atlarini saqlab qolish, milliy iqtisodiyotning raqobatbardoshligini oshirish, qishloq xo‘jaligini modernizatsiya qilish va jadal rivojlantirish, iqtisodiyotda davlat ishtirokini kamaytirish bo‘yicha institutsional va tarkibiy islohotlarni davom ettirish, xususiy mulk huquqini himoya qilish va uning ustuvor mavqeini yanada kuchaytirish, kichik biznes va xususiy tadbirkorlik rivojini rag‘batlantirish, hududlar, tuman va shaharlarni kompleks va mutanosib holda ijtimoiy-iqtisodiy taraqqiy ettirish, investitsiyaviy muhitni yaxshilash orqali mamlakatimiz iqtisodiyoti tarmoqlari va hududlariga xorijiy sarmoyalarni faol jalb etish kabi vazifalarni o‘z ichiga oladi.

Harakatlar strategiyasi mamlakatimizda amalga oshirilayotgan islohotlarning shiddatli kechishini ta’minlamoqda. Unda o‘zbek modelining uzviy davomi sifatida bosqichma-bosqichlik tamoyiliga alohida e’tibor qaratilgan.

Harakatlar strategiyasini besh bosqichda amalga oshirish nazarda tutilmoqda, bunda yillarga beriladigan nomlarga muvofiq Davlat dasturlari tasdiqlanadi. Misol uchun, joriy yilga Xalq bilan muloqot va inson manfaatlari yili, deb nom berildi. Beshta muhim ustuvor yo‘nalishni qamrab olgan 320 banddan iborat Davlat dasturida davlat va jamiyat qurilishini takomillashtirish, qonun ustuvorligini ta’minlash va sud-huquq tizimini isloh qilish, iqtisodiyotni, ijtimoiy sohani rivojlantirish, xavfsizlikni ta’minlash va amaliy tashqi siyosat yuritishga doir vazifalar belgilab qo‘yildi. Mazkur yo‘nalishlar bir-biri bilan uzviy bog‘liq.

Qonun ustuvorligini ta’minlamasdan iqtisodiyotni erkinlashtirish, iqtisodiyotda raqobatni kuchaytirishga erisha olmaymiz. Davlat boshqaruvi tizimida jamoatchilik nazoratini rivojlantirmay qonun ustuvorligini ta’minlash ancha murakkab.

Davlat dasturining “Davlat va jamiyat qurilishini takomillashtirish” deb nomlangan birinchi yo‘nalishini amalga oshirishda davlat hokimiyati tizimida Oliy Majlisning rolini kuchaytirish, qonun ijodkorligi faoliyatining sifatini tubdan yaxshilash, davlat hayotida siyosiy partiyalarning rolini oshirish masalalariga alohida e’tibor qaratilgan. Bunda Oliy Majlisning rolini oshirish maqsadida Qonunchilik palatasi deputatlari, Senat a’zolari har oyda o‘n-o‘n ikki kun joylarga chiqib, u erdagi haqiqiy ahvol bilan tanishishi amaliyoti joriy etilgani saylovchilarimiz, aholining muammolarini echishda muhim ahamiyat kasb etmoqda.

Harakatlar strategiyasida parlament nazoratini takomillashtirishga oid Oliy Majlis palatalari Kengashlarining qo‘shma qarorini qabul qilish, parlamentning xalqaro munosabatlarni yanada rivojlantirishdagi o‘rni va rolini oshirish maqsadida parlament faoliyatini tartibga soluvchi qator qonunlarga o‘zgartish va qo‘shimchalar kiritish borasida aniq vazifalar belgilangan. Bugungi kunda Oliy Majlis palatalarida xorijiy davlatlar parlamentlari bilan do‘stlik guruhlarini tuzish, ularning faoliyatini takomillashtirish, chet ellik hamkorlarni mamlakatimizga investitsiyalar kiritishga jalb qilish bo‘yicha choralar ko‘rilmoqda.

Davlat dasturida jamoatchilik nazoratining huquqiy asoslarini qonun darajasida belgilash, xalqimiz bilan bevosita muloqotni yo‘lga qo‘yish borasida yangi mexanizmlarni joriy qilish nazarda tutilgan. Joylarda ochilgan Prezidentimizning Xalq qabulxonalari buning yorqin misolidir.

Harakatlar strategiyasida davlat boshqaruvini takomillashtirish, avvalo, davlat xizmatini isloh qilish, iqtisodiyotda davlat boshqaruvini kamaytirish, davlat va xususiy sektorlarning o‘zaro manfaatli hamkorligining zamonaviy shakllarini, «Elektron hukumat» tizimini rivojlantirish bo‘yicha chora-tadbirlarni amalga oshirish rejalashtirilgan.

Bunda “Davlat xizmati to‘g‘risida”gi qonunni qabul qilish nazarda tutilganini alohida qayd etish lozim. Mazkur qonun davlat xizmatchilarining huquqlari va majburiyatlari, ularning ijtimoiy himoyasi, moddiy ta’minoti kabi masalalarning barchasini tartibga soladi. Bu orqali davlat organlari faoliyati samaradorligini oshirishga erishiladi.

“Mahalliy davlat hokimiyati organlari to‘g‘risida”gi qonunning yangi tahririni qabul qilish ham belgilangan. Bu kabi yangiliklar davlat boshqaruvini yanada demokratlashtirish, davlat idoralarini xalqimizga yaqinlashtirishga xizmat qiladi. Prezidentimiz ilgari surgan hayotiy g‘oya – xalq davlat idoralariga emas, balki davlat idoralari xalqqa xizmat qilishi kerakligi qonunlar darajasida mustahkamlanadi.

Harakatlar strategiyasi mamlakatimizda islohotlar samaradorligini tubdan oshirish, davlat va jamiyatning har tomonlama va jadal rivojlanishini ta’minlash, hayotimizning barcha sohalarini erkinlashtirish, O‘zbekistonimizning eng rivojlangan davlatlar qatoridan mustahkam o‘rin olishiga xizmat qiladi. 

   Institut  axborot  guruhi  tomonidan   tayyorlandi.